സൂര്യനില്‍നിന്ന് വരുന്ന മാരകമായ അള്‍ട്രാവൈലറ്റ് റേഡിയേഷനില്‍നിന്നും ഭൂമിയിലെ ജീവജാലങ്ങളെ സംരക്ഷിക്കുന്നത് ഭൂമിക്ക് പുറത്തുള്ള ഓസോണ്‍ പാളിയാണ്. ഭൂമിയുടെ അന്തരീക്ഷത്തെ അവയുടെ സ്വഭാവ സവിശേഷത അനുസരിച്ച് നാല് പാളികളായി തിരിച്ചിട്ടുണ്ട്. നാം ജീവിക്കുന്ന പാളിയാണ് ട്രോപ്പോസ്ഫിയര്‍. ട്രോപ്പോസ്ഫിയറിന് തൊട്ട് മുകളിലായുള്ള അന്തരീക്ഷ പാളിയാണ് സ്റ്റ്രാറ്റോസ്ഫിയര്‍. സ്‌ട്രോറ്റോസ്ഫിയറിലാണ് മൂന്ന് ഓക്‌സിജന്‍ ആറ്റങ്ങള്‍ ചേര്‍ന്നുണ്ടാകുന്ന ഓസോണിന്റെ 90 ശതമാനവും കാണപ്പെടുന്നത്. ഈ ഓസോണ്‍ പാളിയിലെ ഏറ്റവും കൂടിയ സാന്ദ്രതയില്‍ ഓസോണ്‍ കാണപ്പെടുന്നത് ഭൂമിയില്‍നിന്നും ഏകദേശം 32 കി.മീ. ഉയരത്തിലാണ്. ഭൂമിയില്‍നിന്നും 10 കി.മീറ്ററിനും 50 കി.മീറ്ററിനും ഇടയിലാണ് ഓസോണ്‍ പാളി കാണപ്പെടുന്നത്. ഓസോൺ നേരിയ അളവിൽ അന്തരീക്ഷത്തിന്റെ എല്ലാ ഭാഗത്തും അടങ്ങിയിരിക്കുന്നു.
അന്തരീക്ഷത്തിന്റെ മുകൾതട്ടിൽ കാണപ്പെടുന്ന ഓസോൺ സൂര്യപ്രകാശത്തിലടങ്ങിയ അൾട്രാവയലറ്റ് രശ്മികളെ ഭൂമിയുടെ ഉപരിതലത്തിലെത്തുന്നതിൽ നിന്ന് തടയുന്നു.
1913 ഫ്രഞ്ച് ഭൗതികശാസ്ത്രഞ്ജന്മാരായ ചാൾസ് ഫാബ്രി, ഹെൻറി ബിഷൺ എന്നിവരാണ് ഇതിന്റെ സാന്നിദ്ധ്യം കണ്ടുപിടിച്ചത്. ബ്രിട്ടീഷുകാരനായ ജി.എം.ബി. ഡൊബ്സൺ ഇതിന്റെ ഘടനയെയും ഗുണങ്ങളെയും പറ്റി മനസ്സിലാക്കി, അദ്ദേഹം സ്പെക്ട്രോഫോമീറ്റർ വികസിപ്പിച്ചെടുത്തു. അദ്ദേഹത്തിന്റെ സ്മരണാർത്ഥം തലയ്ക്ക് മീതെയുള്ള അന്തരീക്ഷത്തിലെ ഓസോണിന്റെ ആകെ അളവിനെ ഡോബ്സൺ യൂണിറ്റ് എന്നു വിളിക്കുന്നു.
ഓസോണ്‍പാളിക്കുണ്ടാകുന്ന നാശം ഭൂമിയിലേക്ക് മാരകമായ അള്‍ട്രാവയലറ്റ് രശ്മികള്‍ വരുന്നതിനെ വര്‍ദ്ധിപ്പിക്കുകയും അവ ക്രമേണ ഭൂമിയിലെ ജീവന്‍ തന്നെ ഇല്ലാതാക്കി മാറ്റുമെന്നും കരുതപ്പെടുന്നു. ലോകത്തിലെ എല്ലാ രാജ്യങ്ങളും ഒരുമയോടെ പ്രവര്‍ത്തിച്ചാല്‍ മാത്രമേ ഓസോണ്‍ നാശകങ്ങളായ രാസപദാര്‍ത്ഥങ്ങളുടെ ഉല്പാദനവും ഉപയോഗവും കുറയ്ക്കാന്‍ സാധിക്കുകയുള്ളൂ എന്ന തിരിച്ചറിവില്‍ നിന്നാണ് 1987 ല്‍ ഐക്യരാഷ്ട്രസഭയുടെ കീഴിലുള്ള അന്താരാഷട്ര പരിസ്ഥിതി സംഘടന (യു.എന്‍.ഇ.പി) കാനഡയിലെ മോണ്‍ട്രിയലില്‍ യോഗം ചേര്‍ന്ന് ഓസോണ്‍ശോഷണ പദാര്‍ത്ഥങ്ങളുടെ (ഒ.ഡി.എസ് -ക്ലോറോഫ്‌ളൂറോ കാര്‍ബണുകള്‍, ഹാലോണുകള്‍, മീഥേല്‍ ക്ലോറോഫോം, കാര്‍ബണ്‍ ടെട്രക്ലോറൈഡുകള്‍, ഹൈഡ്രോ ക്ലോറോഫ്‌ളൂറോ കാര്‍ബണുകള്‍, നൈട്രിക് ഓക്‌സൈഡ്, ബ്രോമിനേറ്റഡ് ഫ്‌ളൂറോ കാര്‍ബണുകള്‍ ) ഉല്പാദനവും ഉപയോഗവും കുറയ്ക്കുന്നതിനുള്ള ഉടമ്പടി വിവിധ അംഗരാജ്യങ്ങള്‍ അംഗീകരിച്ച് പ്രാബല്യത്തില്‍ കൊണ്ടുവന്നത്. ഈ ദിനത്തിന്റെ ഓര്‍മ്മപുതുക്കലാണ് സപ്തംബര്‍ 16 ലെ ഓരോ ഓസോണ്‍ദിനവും.
ക്ലോറോഫ്‌ളൂറോ കാര്‍ബണുകള്‍ അള്‍ട്രാവയലറ്റ് രശ്മിയുമായി പ്രവര്‍ത്തിച്ച് ക്ലോറിനെ സ്വതന്ത്രമാക്കും. ക്ലോറിന്റെ പ്രതിപ്രവര്‍ത്തനം ഓസോണ്‍ തന്മാത്രകളെ നശിപ്പിക്കുമെന്നാണ് ശാസ്ത്രലോകം മുന്നറിയിപ്പ് നല്‍കുന്നത്. ഒരു ക്ലോറിന്‍ ആറ്റത്തിന് കുറഞ്ഞത് ഒരു ലക്ഷം ഓസോണ്‍ തന്മാത്രകളെ നശിപ്പിക്കാനുള്ള കഴിവുണ്ടെന്നാണ് കണക്കുകൂട്ടല്‍. ഓസോണ്‍ പാളികള്‍ക്ക് വിള്ളലുണ്ടാകുന്നതോടെ ഭൂമിയില്‍ അള്‍ട്രാവയലറ്റ് രശ്മികളുടെ തോതുയരും. ഇത് സസ്യങ്ങളുടെ സ്വഭാവിക പ്രതിരോധശേഷി ഇല്ലാതാക്കും. മനുഷ്യനില്‍ മെലനോമ പോലുള്ള മാരക ചര്‍മാര്‍ബുദവും ജനിതകവൈകല്യങ്ങളും പടര്‍ന്നു പിടിക്കുമെന്നും ശാസ്ത്രജ്ഞര്‍ ചൂണ്ടിക്കാണിക്കുന്നു. അതുകൊണ്ട് തന്നെ നമുക്കും ഓസോണിനെ സംരക്ഷിക്കാനായി ഈ വാതകപ്പുതപ്പിന് തുള വീഴാതെ കാക്കാം. നമുക്കുവേണ്ടിയും വരും തലമുറയ്ക്ക് വേണ്ടിയും..
വിദ്യാലയത്തില്‍ ഓസോണ്‍ ദിനാചരണത്തിന്റെ ഭാഗമായി പ്രഭാഷണം, കുറിപ്പ് തയ്യാറാക്കല്‍, പോസ്റ്റര്‍ പ്രദര്‍ശനം, ഓസോണ്‍ കുട ചൂടല്‍ പ്രവര്‍ത്തനങ്ങള്‍, പ്രതിജ്ഞ എന്നിവ നടന്നു.
No comments:
Post a Comment