കായിക രംഗത്ത് മികവ് പുലര്‍ത്തുന്ന കുട്ടികളെ കണ്ടെത്തി അധിക പരിശീലനം നല്‍കുന്നതിനും ഉപജില്ലാ കായിക മേളയിലേക്കുള്ള കുട്ടികളെ കണ്ടെത്തുന്നതിനമായി വിദ്യാലയത്തില്‍ ആദ്യമായി വിപുലമായ കായിക മേള സംഘടിപ്പിച്ചു. സപ്തംബര്‍ 26 ന് രാവിലെ ആരംഭിച്ച കായിക മേളയിലെ റിലേ മത്സരങ്ങള്‍ മഴ കാരണം സപ്തംബര്‍ 28 നാണ് പൂര്‍ത്തിയായത്. എല്ലാ കുട്ടികളെയും ബ്ലൂ, ഗ്രീന്‍, റെഡ്, യെല്ലോ ഹൗസുകളായി തിരിച്ച് ഹൗസ് അടിസ്ഥാനത്തില്‍ നടത്തിയ മത്സരങ്ങള്‍ ആവേശപൂര്‍ണമായിരുന്നു. കായിക താരങ്ങളുടെ മാര്‍ച്ച് പാസ്റ്റില്‍ ഹെഡ്മാസ്റ്റര്‍ സല്യൂട്ട് സ്വീകരിച്ചു. പതാക ഉയര്‍ത്തിയതിനു ശേഷം കുട്ടികള്‍ പ്രതിജ്ഞയെടുത്തു.
ആനന്ദവും ആവേശവും നിറ‍ഞ്ഞു നിന്ന കായിക മേളയില്‍ ബ്ലൂ ഹൗസ് ഒന്നാം സ്ഥാനവും ഗ്രീന്‍ ഹൗസ് രണ്ടാം സ്ഥാനവും നേടി. വിജയികള്‍ക്കുള്ള ട്രോഫി സീനിയര്‍ അസിസ്റ്റന്‍റ് കമലാക്ഷി ടീച്ചര്‍ നല്‍കി. തുടര്‍ന്ന് എല്ലാ കുട്ടികളും അണി നിരന്ന ആഹ്ലാദപ്രകടനവുമുണ്ടായിരുന്നു.
കായിക മേളയിലെ ദൃശ്യങ്ങള്‍ ക്യാമറക്കണ്ണിലൂടെ . . . .
No comments:
Post a Comment